بلڈھانہ ، سادگی سے منعقد ہونے والا نکاح معاشرے کے لیے قابلِ تقلید مثال، سادگی کے ساتھ نکاح کا انعقاد وقت کی اہم ضرورت اور سنتِ نبویؐ کا عملی پیغام کھام گاؤں (واثق نوید کی رپورٹ)
Author -
personحاجی شاھد انجم
نومبر 15, 2026
0
share
ل
موجودہ دور میں شادی بیاہ کی تقریبات میں بڑھتی ہوئی فضول خرچی، غیر ضروری رسومات، جہیز کے مطالبات اور بے جا اخراجات نے معاشرے کے سامنے سنگین مسائل کھڑے کر دیے ہیں۔ ایسے ماحول میں 13 نومبر 2026 کو مسجد دارالسلام، مرزا نگر بلڈھانہ میں نہایت سادگی کے ساتھ منعقد ہونے والا ایک مثالی عقد معاشرے کے لیے قابلِ تقلید نمونہ بن کر سامنے آیا ہے۔ یہ عقد سید صداقت علی (کارکن جماعت اسلامی ہند) کی دختر اور مرحوم نور خان کے فرزند مجاہد خان، ساکن مہکر، جو زبیر خان (رکن جماعت اسلامی) کے چھوٹے بھائی ہیں، کے درمیان انجام پایا۔ اس نکاح کی نمایاں خصوصیت یہ رہی کہ لڑکی والوں کی جانب سے کھانے کا کوئی اہتمام نہیں کیا گیا اور نہ ہی لڑکے والوں کی طرف سے جہیز کا کوئی مطالبہ رکھا گیا۔ دونوں خاندانوں نے سادگی، باہمی رضامندی اور اسلامی تعلیمات کو ترجیح دیتے ہوئے نکاح کی اس تقریب کو ایک بامقصد مثال بنا دیا۔ بلاشبہ آج کے دور میں اس طرح کے نکاح وقت کی اہم ضرورت ہیں۔ مہنگی شادیوں اور سماجی دکھاوے کی دوڑ نے نہ جانے کتنے خاندانوں کو مالی پریشانیوں میں مبتلا کر رکھا ہے۔ کتنے ہی والدین بیٹیوں کی شادی کے لیے قرض کے بوجھ تلے دب جاتے ہیں، جبکہ بے شمار بیٹیاں محض مالی وسائل اور جہیز کے انتظامات نہ ہونے کے سبب رشتوں کے انتظار میں بیٹھی رہ جاتی ہیں۔ شادی کو آسان بنانے کے بجائے اسے مہنگا اور مشکل بنا دینا معاشرے کے لیے ایک بڑا المیہ ہے۔ اسلام نے نکاح کو آسان، بابرکت اور پاکیزہ رشتہ قرار دیا ہے۔ رسول اللہ ﷺ کی تعلیمات ہمیں سادگی، اعتدال اور بے جا تکلفات سے اجتناب کا درس دیتی ہیں۔ لہٰذا نکاح کو غیر ضروری رسم و رواج، جہیز اور فضول خرچی سے پاک رکھنا محض ایک سماجی ضرورت ہی نہیں بلکہ اسلامی تعلیمات اور شریعت کے مزاج کا بھی تقاضا ہے۔ مسجد دارالسلام میں منعقد ہونے والا یہ نکاح دیگر خاندانوں کے لیے ایک واضح پیغام ہے کہ خوشیوں کے اظہار کے لیے لاکھوں روپے خرچ کرنا، جہیز دینا یا مہمانوں کی پرتکلف ضیافت کرنا ضروری نہیں۔ اصل اہمیت نکاح کی پاکیزگی، زوجین کی باہمی محبت اور دونوں خاندانوں کے درمیان خوشگوار تعلقات کی ہے۔ اس مثالی اقدام پر دونوں خاندان یقیناً مبارک باد کے مستحق ہیں۔ ضرورت اس بات کی ہے کہ معاشرے کے ذمہ دار افراد، علمائے کرام، سماجی و ملی تنظیمیں اور نوجوان اس طرح کی مثالوں کو فروغ دیں، تاکہ نکاح آسان ہوں، بیٹیوں کے والدین کو غیر ضروری معاشرتی دباؤ سے نجات ملے اور نئی نسل ایک صحت مند اسلامی معاشرے کی تشکیل میں اپنا کردار ادا کر سکے۔ اللہ تعالیٰ اس جوڑے کی ازدواجی زندگی کو محبت، الفت، سکون اور برکت سے بھر دے، دونوں خاندانوں کے لیے اس رشتے کو باعثِ خیر بنائے اور امتِ مسلمہ کے تمام افراد کو سادگی اور سنت کے مطابق نکاح کرنے کی توفیق عطا فرمائے۔ (آمین)