سجن پوری، ضلع پریشد اردو پرائمری اسکول میں یومِ آزادی کی شاندار تقریب

کھام گاؤں (واثق نوید) ضلع پریشد اردو پرائمری اسکول، سجن پوری تعلقہ کھام گاؤں میں 79واں یومِ آزادی نہایت جوش و خروش، حب الوطنی کے جذبے اور قومی یکجہتی کے ماحول میں منایا گیا۔

 اس موقع پر طلبہ و طالبات نے رنگا رنگ ثقافتی پروگرام پیش کرکے حاضرین کے دل جیت لیے اور اپنی صلاحیتوں کا بھرپور مظاہرہ کیا۔

تقریب کی صدارت محترمہ ریشمہ بانو نے کی، جبکہ مہمانانِ خصوصی کے طور پر سجن پوری گاؤں کی سرپنچ مہرونسا بیگم، سید مظفر، شیخ اسلم، شیخ گلاب، شیخ عمران، محمد انیس، اور شیخ اشفاق شریک ہوئے۔ معزز مہمانوں نے طلبہ کی شاندار کارکردگی اور اسکول کے مثالی تعلیمی ماحول کی بھرپور ستائش کی۔

پروگرام کے دوران طلبہ نے حب الوطنی سے سرشار گیت، ولولہ انگیز تقاریر، قومی رہنماؤں کی خدمات پر مبنی خاکے اور شجرکاری کی سرگرمیوں کے ذریعے ماحول کو قومی جذبے سے معمور کردیا۔ 

طلبہ کی پُراعتماد پیشکشوں نے حاضرین کو بے حد متاثر کیا اور اسکول کی تعلیمی و تربیتی کاوشوں کا عملی ثبوت پیش کیا۔

تقریب کی نظامت صدر معلمہ شمیم بانو نے نہایت خوش اسلوبی، وقار اور عمدگی کے ساتھ انجام دی۔ پروگرام کو کامیاب بنانے میں اساتذہ جاوید شاہ اور آفرین بانو کی انتھک محنت اور بہترین منصوبہ بندی قابلِ ستائش رہی۔ 

آخر میں محمد نعیم احمد نے اظہارِ تشکر پیش کرتے ہوئے تمام مہمانوں، اساتذہ، والدین اور طلبہ کا شکریہ ادا کیا۔ یومِ آزادی کی اس تقریب کا ایک اہم پہلو یہ بھی رہا کہ طلبہ، اساتذہ اور سرپرستوں نے اجتماعی طور پر نشہ آور اشیاء سے دور رہنے اور معاشرے کو نشہ سے پاک بنانے کا عہد کیا۔
 پروگرام کے اختتام پر طلبہ میں مٹھائی تقسیم کی گئی۔ واضح رہے کہ ضلع پریشد اردو پرائمری اسکول سجن پوری اپنے مثالی نظم و ضبط، دلکش رنگ و سجاوٹ، معیاری تعلیمی سرگرمیوں اور طلبہ کی مسلسل بڑھتی ہوئی تعداد کے سبب تعلیمی حلقوں میں خصوصی مقام حاصل کر رہا ہے۔
 اسکول کی نمایاں کارکردگی اور تعلیمی معیار کی بدولت والدین اور عوام میں اس ادارے کے تئیں اعتماد روز بروز مستحکم ہو رہا ہے۔