پیپل گاؤں راجہ ، 80 یتیم بچوں کی تعلیمی کفالت، سرپنچ اور سماجی کارکن کا قابلِ تحسین اقدام کھام گاؤں (واثق نوید)

 یتیم اور ضرورت مند بچوں کی تعلیم کو مالی مشکلات کے باعث متاثر ہونے سے بچانے کے لیے پیپل گاؤں راجہ میں ایک قابلِ تقلید قدم اٹھایا گیا۔ 
گاؤں کے سرپنچ شیخ شاکر شیخ چاند اور سماجی کارکن ذوالقرنین شیخ چاند نے یتیم بچوں کی تعلیمی کفالت کی ذمہ داری قبول کرتے ہوئے گاؤں کی مختلف اسکولوں میں زیر تعلیم 80 یتیم بچوں اور ان کے خاندانوں کو سہارا فراہم کیا۔
موصولہ اطلاعات کے مطابق گاؤں کے ضلع پریشد مراٹھی پرائمری اسکول بوائز ، ضلع پریشد مراٹھی پرائمری اسکول گرلز، ضلع پریشد اردو مڈل اسکول گرلز، ضلع پریشد اردو مڈل اسکول بوائز، گلشن حفیظہ اردو اسکول 
 میں زیرِ تعلیم یتیم طلبہ کی تعلیمی ضروریات پوری کرنے کے لیے انہیں مالی مدد اور ضروری تعلیمی سامان فراہم کیا گیا۔ 
اس اقدام سے ان بچوں اور ان کے خاندانوں کو بڑی راحت ملی ہے۔
سرپنچ شیخ شاکر شیخ چاند نے کہا کہ مالی مشکلات کی وجہ سے کسی یتیم بچے کی تعلیم متاثر نہیں ہونی چاہیے۔ تعلیم ہر بچے کا بنیادی حق ہے اور ضرورت مند بچوں کا سہارا بننا ہم سب کی ذمہ داری ہے۔
انہوں نے مزید کہا کہ بچوں کی تعلیمی کفالت محض وقتی مدد نہیں بلکہ ان کے روشن مستقبل کی بنیاد مضبوط کرنے کی ایک کوشش ہے۔
اس موقع پر اسکول کے صدرِ مدرس اور اساتذہ نے سرپنچ اور سماجی کارکن کے اس انسان دوست اقدام کو سراہتے ہوئے ان کا شکریہ ادا کیا۔ 
دریں اثنا، معروف سماجی کارکن شیخ عبدالعلیم عبدالفہیم نے بھی گاؤں کے 48 یتیم بچوں کو بال سنگوپن (بچوں کی پرورش) اسکیم کے تحت سرکاری مالی امداد دلانے کے لیے کوششیں شروع کی ہیں۔ انہوں نے کہا کہ یتیم بچوں کی تعلیم اور پرورش مالی مشکلات کے باعث متاثر نہیں ہونی چاہیے۔
مقامی عوام نے اس اقدام کو سراہتے ہوئے کہا کہ معاشرے کے صاحبِ حیثیت افراد اور عوامی نمائندے اگر یتیم بچوں کی تعلیم و تربیت کی ذمہ داری اسی جذبے کے ساتھ قبول کریں تو ان بچوں کے مستقبل کو بہتر اور روشن بنایا جاسکتا ہے۔
پیپل گاؤں راجہ میں یتیم بچوں کی تعلیمی کفالت کا یہ اقدام خدمتِ خلق اور سماجی ذمہ داری کی ایک قابلِ تقلید مثال بن کر سامنے آیا ہے۔