چکھلی , ’محفوظ بچپن مہم‘ کے تحت طلبہ میں قانونی بیداری، 200 طلبہ کی رہنمائی کرَم انگلش اسکول میں طلبہ کو بچوں کے حقوق، تحفظ اور ہیلپ لائن نمبروں سے متعلق فراہم کی گئیں معلومات

کھام گاؤں (واثق نوید) بچوں کے تحفظ، ان کے حقوق سے متعلق بیداری پیدا کرنے اور محفوظ ماحول کی فراہمی کے مقصد سے کرَم انگلش اسکول، چکھلی میں ’محفوظ بچپن مہم‘ کے تحت بیداری پروگرام منعقد کیا گیا۔

 اس موقع پر اسکول کے نوٹس بورڈ پر NALSA ٹول فری ہیلپ لائن، چائلڈ ہیلپ لائن اور سائبر کرائم ہیلپ لائن نمبروں کی معلومات پر مشتمل بینر آویزاں کیا گیا، تاکہ طلبہ ضرورت کے وقت متعلقہ خدمات سے آسانی کے ساتھ رابطہ کرسکیں۔ پروگرام کے دوران طلبہ نے بچوں کے تحفظ اور ان کے حقوق سے متعلق بیداری پیدا کرنے والے پلے کارڈز اور بینرز کے ذریعے اپنی شرکت درج کرائی۔

 اس مہم کا بنیادی مقصد طلبہ کو اپنے حقوق سے واقف کرنا، ان کے تحفظ کے سلسلے میں شعور بیدار کرنا اور محفوظ ماحول کی اہمیت اجاگر کرنا تھا۔ 
اس موقع پر کرَم انگلش اسکول، چکھلی کے صدر مدرس افضل حسین اور قانونی ماہر محترمہ سنیتا جادھو خصوصی طور پر موجود تھے۔ کیمپ میں اسکول کے تقریباً 200 طلبہ کی رہنمائی کی گئی۔ پروگرام کی نظامت محمد تبریش سر نے انجام دی۔ اس موقع پر اسکول کے طلبہ اور اساتذہ بڑی تعداد میں موجود تھے۔
 یہ بیداری کیمپ طلبہ میں قانونی معلومات، بچوں کے حقوق اور تحفظ کے تئیں شعور پیدا کرنے کے حوالے سے مفید ثابت ہوا۔