کھام گاؤں ، فاطمہ شیخ ایجوکیشن اینڈ ویلفیئر سوسائٹی کا لائنس اَنّ چھتر کے تحت فلاحی اقدام

 

کھام گاؤں (واثق نوید) کھام گاؤں میں خدمتِ انسانیت کی ایک قابلِ تقلید مثال اس وقت دیکھنے میں آئی جب فاطمہ شیخ ایجوکیشن اینڈ ویلفیئر سوسائٹی، پیپل گاؤں راجہ کے اشتراک سے لائنس کلب کھام گاؤں کے زیرِ اہتمام چلنے والے مستقل سماجی منصوبے لائنس اَنّ چھتر کے تحت ضرورت مندوں کے لیے مفت کھانے کا اہتمام کیا گیا۔ 

یہ فلاحی پروگرام مورخہ ۱۱ جنوری ۲۰۲۶، بروز اتوار صبح ۱۰:۲۰ بجے سرکاری عام اسپتال، کھام گاؤں (شدوری گرہ) میں منعقد ہوا، جہاں زیرِ علاج مریضوں اور ان کے ہمراہ موجود تیمارداروں کو معیاری اور مفت کھانا فراہم کیا گیا۔
 اس دن کے اَنّ دان کا مکمل اہتمام فاطمہ شیخ ایجوکیشن اینڈ ویلفیئر سوسائٹی کی جانب سے کیا گیا۔
قابلِ ذکر ہے کہ لائنس کلب کھام گاؤں کا یہ فلاحی منصوبہ اپنے ۹ویں سال میں داخل ہو چکا ہے اور یہ اس کا ۱۹۵واں دن تھا، جو کامیابی کے ساتھ مکمل ہوا۔ 
لائنس اَنّ چھتر منصوبہ بھوک مٹانے کے ساتھ ساتھ سماج میں بھائی چارے، ایثار اور انسانی ہمدردی کو فروغ دینے میں اہم کردار ادا کر رہا ہے۔ اس موقع پر معروف سماجی کارکن نذر محمد، ریڈیئنٹ انسٹی ٹیوٹ ناندیڑ کے مینیجنگ ڈائریکٹر ایس۔ ایم۔ سمیم ماجد بطورِ خاص موجود تھے۔ 
پروگرام سے خطاب کرتے ہوئے فاطمہ شیخ ایجوکیشن اینڈ ویلفیئر سوسائٹی کے صدر  عاقب صاحب نے نوجوانوں میں سماجی بیداری پیدا کرنے پر زور دیا۔ انہوں نے کہا کہ تعلیم یافتہ نوجوانوں کو محض ڈگریوں تک محدود نہ رہتے ہوئے عملی طور پر سماج کی خدمت میں آگے آنا چاہیے۔ 
انہوں نے مزید کہا کہ صحت، تعلیم اور سماجی بہبود جیسے شعبوں میں نوجوانوں کی شمولیت وقت کی اہم ضرورت ہے، کیونکہ ایسے ہی اقدامات سماج میں مثبت تبدیلی کا سبب بنتے ہیں۔
پروگرام کے دوران حاضرین نے فاطمہ شیخ ایجوکیشن اینڈ ویلفیئر سوسائٹی اور لائنس کلب کھام گاؤں کی خدمات کو سراہتے ہوئے اسے انسانیت نوازی اور بھائی چارے کی مضبوط مثال قرار دیا۔ 
آخر میں لائنس اَنّ چھتر ٹیم اور لائنس کلب کھام گاؤں پی۔ایس۔ٹی۔ ۲۰۲۵–۲۶ کی جانب سے تمام معاون اداروں، مہمانوں اور رضاکاروں کا شکریہ ادا کیا گیا۔