چکھلی ، دعوتِ اسلامی ہند کا حج تربیتی کیمپ منعقد، عازمینِ حج کی بھرپور شرکت

 

کھام گاؤں (واثق نوید) دعوتِ اسلامی ہند کے زیرِ اہتمام جامع مسجد اہلِ قریش، چکھلی میں ضلعی سطح کا حج تربیتی اجتماع نہایت عقیدت و اہتمام کے ساتھ منعقد کیا گیا، جس میں علمائے کرام نے عازمینِ حج کو مناسکِ حج سے متعلق جامع اور ایمان افروز رہنمائی فراہم کی۔ اس موقع پر ضلع بھر سے بڑی تعداد میں عازمینِ حج شریک ہوئے۔

تفصیلات کے مطابق دعوتِ اسلامی ہند، اہلِ سنت والجماعت کی ایک فعال دینی تحریک ہے جو مختلف شعبہ جات کے ذریعے دینِ اسلام کی اشاعت اور ملت کی فلاح و بہبود کے لیے سرگرمِ عمل ہے۔ انہی شعبوں میں ایک اہم شعبہ عازمینِ حج و عمرہ کی تربیت بھی شامل ہے، جس کے تحت ہر سال ملک بھر میں تربیتی کیمپس منعقد کیے جاتے ہیں۔

اسی سلسلے کی ایک کڑی کے طور پر اتوار، 29 مارچ 2026ء کو چکھلی کی جامع مسجد اہلِ قریش میں اس سال کا ضلعی حج تربیتی کیمپ منعقد کیا گیا۔ پروگرام کا آغاز مسجد کے امام و خطیب مولانا ریحان مدنی عطاری کے افتتاحی کلمات سے ہوا، جنہوں نے اجتماع کی اہمیت و مقاصد پر روشنی ڈالتے ہوئے حج کی عظمت و فضیلت بیان کی۔ اس موقع پر خصوصی خطاب کرتے ہوئے مولانا عابد عطاری نے حج کی فرضیت، ارکانِ حج، واجبات اور مکمل طریقۂ ادائیگی کو تفصیل کے ساتھ بیان کیا۔ انہوں نے سفرِ حج، قیام کے دوران احتیاطی تدابیر اور دیگر ضروری امور پر بھی عازمین کی رہنمائی کی۔ مزید برآں، مدینہ منورہ کے سفر، مسجدِ نبوی ﷺ کی حاضری اور روضۂ رسول ﷺ کے آداب پر بھی نہایت مؤثر انداز میں روشنی ڈالی گئی۔ اجتماع کے اختتام پر امیرِ اہلِ سنت مولانا الیاس قادری کی معروف کتاب رفیق الحرمین شرکا میں بطورِ تحفہ تقسیم کی گئی۔ آخر میں مولانا کی رقت آمیز دعا کے ساتھ یہ روحانی و تربیتی اجتماع اختتام پذیر ہوا۔
اس تربیتی کیمپ میں ضلع بلڈھانہ کے مختلف علاقوں سے تعلق رکھنے والے عازمینِ حج نے کثیر تعداد میں شرکت کرتے ہوئے اس رہنمائی سے بھرپور استفادہ حاصل کیا۔