احباب کالونی میں آسمانی بجلی کا قہر، جانی نقصان سے معجزانہ بچاؤ، مالی نقصان

کھام گاؤں (واثق نوید) آج صبح کھام گاؤں شہر کی گنجان آبادی احباب کالونی میں اچانک موسم کی شدت نے اس وقت سب کو حیران کر دیا جب تقریباً پونے سات بجے زور دار گرج چمک کے ساتھ آسمانی بجلی ایک رہائشی مکان پر آ گری۔
 شدید بارش کے ساتھ پیش آئے اس واقعے میں اگرچہ کوئی جانی نقصان نہیں ہوا، مگر گھروں کے اندر موجود برقی و الیکٹرانک آلات بری طرح متاثر ہوئے، اور ہزاروں روپئے کے مالی نقصان کی اطلاع موصول ہوئی ہے۔
آسمانی بجلی انجمن ہائی اسکول کے ملازم رہبر خان سکندر خان کے مکان پر گری۔ اچانک گرج دار آواز اور بجلی کی تیز چمک نے پورے علاقے کو ہلا کر رکھ دیا۔ متاثرہ مکان کے اندر موجود کئی الیکٹرانک آلات، فریج، پنکھے، انورٹر، اور دیگر برقی اشیاء جل گئیں، جبکہ اردگرد کے گھروں میں بھی نقصان کی خبریں موصول ہو رہی ہیں۔
واقعے کے بعد احباب  نے اپنے گھروں کے مین سوئچ بند کر دیے ۔ مقامی شہریوں نے بجلی محکمہ اور بلدیہ کو اطلاع دی اور احتیاطی اقدامات کا مطالبہ کیا۔
ماہرین کے مطابق بارش کے موسم میں آسمانی بجلی گرنے کے امکانات بڑھ جاتے ہیں، خاص طور پر ایسے علاقوں میں جہاں برقی لکیریں کھلی ہوں یا گھروں کی چھتوں پر حفاظتی نظام موجود نہ ہو۔
 ایسے میں عوام کو کچھ بنیادی احتیاطی تدابیر اختیار کرنا نہایت ضروری ہے، جیسے بارش کے دوران برقی آلات کا استعمال بند کرنا، موبائل یا کمپیوٹر سے دور رہنا، کھلے میدانوں یا بلند جگہوں پر جانے سے پرہیز کرنا، اور گھروں میں لائٹننگ ارریسٹر جیسے حفاظتی آلات نصب کروانا۔
حالیہ واقعہ نہ صرف ایک انتباہ ہے بلکہ ایک موقع بھی ہے کہ ہم اپنی حفاظت کے لیے سنجیدگی اختیار کریں۔ شہری انتظامیہ اور مقامی بلدیاتی اداروں کو چاہیے کہ وہ ایسے علاقوں میں خطرے کی نشان دہی کرتے ہوئے عوامی بیداری مہم شروع کریں، تاکہ مستقبل میں کسی بڑے حادثے سے بچا جا سکے۔

⚠️ بارش و آسمانی بجلی کے دوران احتیاطی تدابیر
📌 گھر میں رہیں: گرج چمک یا آسمانی بجلی کے وقت بلا ضرورت باہر نہ نکلیں۔
📌 برقی آلات بند کریں: ٹی وی، کمپیوٹر، فریج، انورٹر، موبائل چارجر وغیرہ فوراً بند کر دیں۔
📌 موبائل استعمال نہ کریں: بجلی کے دوران موبائل فون یا دیگر وائرلیس آلات استعمال کرنے سے گریز کریں۔
📌 اونچی جگہوں سے دور رہیں: کھلے میدان، درخت، چھت، پانی کے ذخائر اور بجلی کے کھمبوں سے دور رہیں۔
📌 لائٹننگ ارریسٹر نصب کریں: گھروں میں آسمانی بجلی سے تحفظ کے لیے Lightning Arrestor نصب کروائیں۔
📌 فوری اطلاع دیں: کسی بھی ہنگامی حالت میں بجلی محکمہ یا مقامی انتظامیہ سے رابطہ کریں۔
🛑 یاد رکھیں: قدرتی آفات کے دوران احتیاط ہی سب سے بڑا تحفظ ہے!