جمہوری نظام کو مضبوط بنانے میں ووٹ کی اہمیت از قلم محمد سرور شریف ابن یوسف شریف پربھنی 9960451708

 

قارئین جیسا کے آپ جانتے ییں کے ہمارے شہر عزیز اور ریاست مہاراشٹر میں بلدیہ عظمیٰ ( مہا نگر پالیکا ) کے انتخابات کا ماحول گرم یے مختلف سیاسی  جماعتوں اور پارٹیوں کے امیدوار میدان انتخاب میں اپنے تن من دھن اور عوامی مسائل حل کرنے کے وعدوں کے ساتھ گلی کوچوں میں اپنی انتخابی مہم زور و شور سے چلا رہیں قارئین کرام اسں سے پہلے کے آپ اپنے بنیادی حق ووٹ کا استعمال کریں ہم ضروری سمجھتے ہیں کے جمہوری نظام میں ووٹ کی اہمیت سے آپ کو واقف کرائیں قارئین در اصل ہماری اس تحریر کا  مقصد مسلمانوں میں صحیح سیاسی شعور بیدار کرنا اور ووٹ کے فیصد میں اضافہ کرنا یے
 قارئین جمہوریت ایک ایسا نظامِ حکومت ہے جس میں ہم کو یہ حق حاصل ہوتا ہے کہ ہم اپنے نمائندوں کا انتخاب خود کریں۔ اس نظام کی بنیاد عوامی رائے پر ہوتی ہے، اور ووٹ وہ ذریعہ ہے جس کے ذریعے ہم اپنی آواز اقتدار کے ایوانوں تک پہنچاتے ہیں۔ اسی لیے ووٹ دینا نہ صرف ایک حق بلکہ ایک اہم قومی اور اخلاقی ذمہ داری بھی ہے۔
ووٹ کے ذریعے ہم یہ فیصلہ کرتے ہیں کہ کون سا فرد یا جماعت ملک و معاشرے کی قیادت کے قابل ہے۔ جب ہم اپنے ووٹ کے حق کا استعمال کرتے ہیں تو وہ جمہوری نظام کو مضبوط بناتا ہے اور ملک کے مستقبل کی سمت متعین کرنے  میں معاون و مدد گار بھی بنتا ہے ۔ اس کے برعکس، ووٹ نہ دینا دراصل اپنی رائے اور اختیار سے دستبردار ہونا ہے، جس کا نقصان پورے معاشرے کو اٹھانا پڑتا ہے۔
جمہوری نظام اسی وقت مستحکم ہوتا ہے جب عوام باشعور ہوں اور ذمہ داری کے ساتھ ووٹنگ میں حصہ لیں۔ ووٹ صرف ایک پرچی یا ووٹنگ مشین کے بٹن دبانے کا عمل نہیں  ہے بلکہ یہ انصاف، ترقی، امن اور بہتر مستقبل کی ضمانت ہے۔  ہمارا ایک درست ووٹ نااہل قیادت کو روک سکتا ہے اور باصلاحیت افراد کو آ گے لا سکتا ہے۔
 اس ضمن میں یہ بھی ضروری ہے کہ ووٹ ذاتی مفاد، لالچ یا دباؤ کے بغیر دیا جائے۔ ہمیں اپنے ضمیر کی آواز اور شعور کے مطابق ایسے نمائندوں کا انتخاب کرنا چاہیے جو ایماندار ہوں، عوامی مسائل کو سمجھتے ہوں اور ملک و قوم اور انسانیت کی خدمت کا جذبہ رکھتے ہوں۔
مختصر یہ کہ جمہوری نظام کی مضبوطی عوام کی بیداری سے جڑی ہوئی ہے، اور عوامی بیداری کا سب سے مؤثر اظہار ووٹ کے ذریعے ہوتا ہے۔
قارئین آپ سے گزارش ہے کے  جمہوریت کو مستحکم بنانے کے  لیے جس طرح آپ نے حکمت ، بصیرت اور جوش و خروش  اور پر امن  طریقے کے ساتھ  لوک سبھا اور اسمبلی انتخابات میں حصہ لیا تھا اسی طرح اس بار  بھی ہماری ریاست مہاراشٹر کے مختلف اضلاع میں منعقدہ بلدیہ عظمی  ( مہا نگر ہالیکا )  کے لیے  15جنوری بروز جمعرات کو ہونے والی ووٹنگ کے عمل  میں بھی بڑھ چڑھ کر حصہ لیں اور اپنے حق ووٹ کا ضرور استعمال کریں کیونکہ ہمارا ایک ووٹ ہمارے  شہر ریاست اور ملک کے بہتر مستقبل کی بنیاد بن سکتا ہے۔