شیگاؤں ، جماعت اسلامی ہند کا عید ملن پروگرام، بین المذاہب ہم آہنگی کا خوبصورت مظاہرہ

 

کھام گاؤں (واثق نوید) جماعت اسلامی ہند، شیگاؤں یونٹ کے زیر اہتمام 5 اپریل 2026 بروز اتوار بعد نمازِ مغرب مسجد حضرت عمر فاروقؓ، آزاد نگر میں ایک شاندار عید ملن پروگرام کا انعقاد عمل میں آیا، جس میں برادرانِ وطن اور ملی برادران کی کثیر تعداد نے شرکت کی۔

پروگرام کا آغاز حافظ اسماعیل خان (امامِ مسجد) کی تلاوتِ کلام پاک سے ہوا، جنہوں نے سورۃ النساء کی پہلی آیت پیش کی، جبکہ اس کا مراٹھی ترجمہ ناصر خان نے سنایا۔
افتتاحی خطاب میں امیرِ مقامی ڈاکٹر انصار صاحب نے جماعت اسلامی ہند کے اغراض و مقاصد پر روشنی ڈالتے ہوئے کہا کہ جماعت ملک کے دستور کے دائرے میں رہتے ہوئے اقامتِ دین کی جدوجہد کر رہی ہے۔

ثناء بک ڈپو انجمن چوک مالیگاؤں حاجی شاہد انجم 

9270416786

 انہوں نے کہا کہ بھارتی دستور جہاں آزادی، انصاف اور مساوات کا درس دیتا ہے، وہیں قرآن پوری انسانیت کو ایک ہی ماں باپ کی اولاد قرار دے کر بھائی چارے کا پیغام دیتا ہے۔
 انہوں نے مزید کہا کہ جماعت اسلامی ہند کے دستور کے مطابق ہر بھارتی شہری اس کا رکن بن سکتا ہے، بشرطیکہ وہ عقیدۂ توحید اور اقامتِ دین کو اپنا نصب العین بنائے اور جماعت کے طریقۂ کار سے اتفاق کرے۔
صدارتی خطاب میں سہیل فرقان سر (ناظم ضلع، جماعت اسلامی ہند، بلڈانہ نارتھ) نے رمضان، روزہ اور قرآن کی اہمیت پر تفصیل سے روشنی ڈالتے ہوئے کہا کہ روزوں کا اصل مقصد تقویٰ کا حصول ہے، جو انسان کو قرآن پر عمل پیرا ہونے کی قوت عطا کرتا ہے۔ 
انہوں نے کہا کہ قرآن مجید انسانیت کی رہنمائی کے لیے نازل کیا گیا ایک مکمل ضابطۂ حیات ہے۔
انہوں نے مسجد کے تعارف میں بتایا کہ مسجد میں صرف اللہ وحدہٗ لا شریک کی عبادت کی جاتی ہے، 
اسی لیے یہاں نہ کوئی تصویر ہوتی ہے اور نہ مورتی۔ انہوں نے بین المذاہب ہم آہنگی کے حوالے سے کہا کہ دیگر مذاہب کے ماننے والوں کے جذبات کا احترام کیا جانا چاہیے، تاہم مسلمانوں کے مذہبی اصولوں کا لحاظ رکھنا بھی ضروری ہے۔
پروگرام میں تقریباً 80 برادرانِ وطن اور 40 ملی برادران نے شرکت کی۔ آخر میں عظیم خان نے اظہارِ تشکر ادا کیا۔
 جب کہ نظامت کے فرائض شکیل سر نے انجام دیے۔ اختتام پر شرکاء میں شیر خورمہ تقسیم کیا گیا۔
شرکاء نے پروگرام کو بے حد سراہا اور اسے باہمی ہم آہنگی اور بھائی چارے کے فروغ کی ایک مؤثر کاوش قرار دیا، خصوصاً سہیل فرقان سر کی مراٹھی تقریر کو خوب پذیرائی حاصل ہوئی۔