کھام گاؤں (واثق نوید) ضلع پریشد اردو اعلیٰ تحتانوی
مدرسہ بوائز، پیپل گاؤں راجہ میں 30 جون 2026ء کو سینئر مدرس شفیق الرحمن کی 34 سالہ کامیاب تدریسی خدمات کی تکمیل پر ایک پُروقار اور جذباتی الوداعی تقریب منعقد کی گئی۔
تقریب میں اساتذہ، عملۂ تدریس، اسکول مینجمنٹ کمیٹی کے ذمہ داران اور معززین نے بڑی تعداد میں شرکت کرتے ہوئے ان کی گرانقدر خدمات کو خراجِ تحسین پیش کیا۔
تقریب کی صدارت صدر مدرس عبدالاحد صاحب نے کی،
جب کہ اسکول مینجمنٹ کمیٹی کے صدر جاوید اقبال مہمانِ خصوصی کی حیثیت سے شریک ہوئے۔ مقررین نے اپنے خطابات میں کہا کہ شفیق الرحمن سر نے 34 سالہ تدریسی زندگی میں اخلاص، محنت اور فرض شناسی کی روشن مثال قائم کی۔ ان کی بیشتر ملازمت پنچایت سمیتی کھام گاؤں کے مختلف مدارس میں گزری، جبکہ تقریباً 22 برس تک انہوں نے ضلع پریشد اسکول پیپل گاؤں راجہ میں خدمات انجام دے کر ہزاروں طلبہ کی علمی و اخلاقی تربیت میں نمایاں کردار ادا کیا۔
شفیق الرحمن سر نے اپنے خطاب میں تدریسی سفر کے یادگار لمحات اور تجربات حاضرین کے ساتھ شیئر کرتے ہوئے ساتھی اساتذہ، طلبہ، والدین اور انتظامیہ کی جانب سے ملنے والی محبت، تعاون اور عزت افزائی پر دلی تشکر کا اظہار کیا۔ ان کے جذباتی خیالات نے تقریب کے شرکاء کو متاثر کیا۔
تقریب کے اختتام پر شفیق الرحمن سر کی علمی، تعلیمی اور اخلاقی خدمات کے اعتراف میں انہیں گل پیش کیے گئے۔ شرکاء نے ان کی صحت، خوشحالی، درازیٔ عمر اور پُرسکون ریٹائرمنٹ کے لیے خصوصی دعا کی اور اس عزم کا اظہار کیا کہ ان کی دیانت دارانہ خدمات اور تعلیمی جذبہ نئی نسل کے اساتذہ کے لیے ہمیشہ مشعلِ راہ رہے گا۔
