دل کی گہرائیوں میں جب ا لفاظ اُتر آئیں تو وہ محض الفاظ نہیں رہتے، وہ روح کی تازگی کا سبب بن جاتے ہیں۔ ایسا ہی ہے اثرؔ صدیقی کا کلام، جو مالیگاؤں کی گلیوں سے نکل کر عالمی محفلوں تک پہنچا ہے۔ مالیگاؤں، یہ وہ شہر ہے جہاں مسجدوں سے اذانوں کے ساتھ ساتھ مشاعروں کی صدائیں بھی گونجتی ہیں، اور اثر صدیقی اس شہر کے وہ ناظم ہیں جو مشاعرہ کو محض محفل نہیں، بلکہ ایک روحانی اجتماع بنا دیتے ہیں۔
معتبر شاعر، آل انڈیا مشاعروں کے مستعد و موثر ناظم، اثر صدیقی کا نام اردو ادب کے افق پر ایک روشن ستارہ ہے جو غزل کی روایتی جادوگری کو نعت کی پاکیزگی سے ملاتا ہے۔
اثر صدیقی صاحب کی کتاب انشراح گھر بیٹھے انڈیا میں حاصل کرنے کے لیئے رابطہ قائم کریں ۔ثناء بک ڈپو 
ملک بھر اور بیرون ملک مشاعروں میں ان کی موجودگی نہ صرف شاعری کا اعزاز ہے، بلکہ ایک ایسے فنکار کی گواہی ہے جو الفاظ کو برتنے کے سلیقے کے ساتھ ساتھ ،اس کی گہرائیوں میں اتر کر قلب و روح کو منور کرنا جانتا ہے۔
اُن کی شاعری میں وہ جادو ہے جو سننے والے کو اپنے اندر کی تلاش کی طرف لے جاتا ہے، جہاں ہر شعر ایک دعوتِ فکر ہے اور ہر مصرعہ ایک راہِ ہدایت۔حال ہی میں، مولانا امتیاز فلاحی کی شفقت مند ہستی اور بھیونڈی کے معروف قلمکار رونق افروز کی مجھ ناچیز سے دلی قربت کے سبب ان کا مجموعہ کلام "انشراح" میسر ہوا۔
یہ کتاب کوئی عام کتاب نہیں، بلکہ ایک روحانی سفرنامہ ہے جہاں ہر غزل اور ہر نعت دل کی تنگ نالیوں کو کھول دیتی ہے۔ "انشراح" کا لفظ خود قرآن مجید کی ایک سورۃ کا نام ہے، جو اللہ کی رحمت سے دل کی کشادگی کی طرف اشارہ کرتا ہے۔ اثر صدیقی نے اس مجموعے میں وہی کر دکھایا ہے۔ الفاظ کو ایسا پھیلایا ہے کہ قاری کی روح تک اُس کی لہروں نےارتعاش پیدا کر دیا۔
یہ مجموعہ نومبر 2020ء میں شائع ہوا، اور اس کے صفحات پلٹنے پر ایسا لگتا ہے جیسے کلام کا ہر مصرعہ روح کو گہرائی میں اتر رہا ہے اور کثافتیں دُھل کر پاکیزگیٔ روح و جسم کا سبب بن رہی ہیں۔ مجموعے میں غزلیں، حمدو نعت اور نظمیں شامل ہیں، جو سب مل کر ایک ایسی تصویر بناتی ہیں جہاں عشقِ الٰہی کی داستان الفاظ کی زبانی سنائی جاتی ہے۔مجموعے کی ابتدائی غزل، جو اس کی روح ہے، ایک ایسی فریاد ہے جو اللہ کی نعمتوں کی وسعت کو بیان کرنے کی بے بسی کو عیاں کرتی ہے۔ یہ غزل، جو کتاب کے صفحہ نمبر ۲۶؍ پر رقم ہے اس کا یہ شعر؎
ترے عشق کے جو اسیر ہیں، تری رحمتوں کے سفیر ہیں
کبھی اک چٹائی پہ سو گئے، کبھی آسمان سے گذر گئے
اللہ کے دوستوں کی اسیری اور ان کے تصرف کا ایک ایسا بیاں ہے جو سمٹے تو دو مصرعے ہیں اور وسعت میں کل کائنات ۔
اس غزل سے قبل حمد اور ’’حرف سلام ﷺ‘‘ کے عنوان سے نعت پاک میں جناب اثر ؔصدیقی نے اللہ جل جلالہ اور عم نوالہ کی بزرگی ، برتری اور کرم کا اظہار کیا ہے اور یہ شعر؎
تصور کا سمندر، کاغذی کشتی اثر ؔ کی
کرم اُس کا جزیرہ فکر کا شرما رہا ہے
شاعر کی دلی کیفیت کی بھرپور عکاسی کر رہا ہے۔
اور حرفِ سلام ﷺ کے عنوان سے جو نعت کہی اس کا انداز اوروں سے جُدا،مضمون اچھوتا اور دل نشیں پیرایا،قاری کو بار بار اس نعت نبیﷺ کو پڑھنے پر مجبور کرتا ہے۔ساتھ ہی شاعر کی قادر الکلامی ثابت کرتا ہے۔؎
اے مرےخُلقِ مجسم! اے نشاطِ کائناتﷺ!
کیف ِ جاں ہے تیرا ہر اسم ِ شریف
لذتِ بے مثل ہیں تیری قصیدہ خوانیاں
نعت پاک کے یہ تین مصرعے شاعر کی نبیٔ پاک صاحب لولاکﷺ سے عشق و محبت اور وارثِ حسان ہونے کا ثبوت ہیں ۔
آئیے اب چلتے ہیں کتاب کے دورے پر ۔۔۔
شاعری کی روایت میں کچھ نام ایسے ہوتے ہیں جن کی موجودگی محض اشعار کے آہنگ یا الفاظ کی گہرائی سے محسوس نہیں ہوتی بلکہ وہ اپنے عہد کے احساس، اپنی مٹی کی خوشبو اور اپنی زبان کی تہذیبی روح کے نمائندہ بن جاتے ہیں۔ اثر صدیقیؔ مالیگاؤں کا شمار انہی باکمال شاعروں میں ہوتا ہے جنہوں نے لفظ کو دل کی دھڑکن اور احساس کو فکر کی روشنی بنایا۔ وہ شاعر جن کے یہاں عشق محض جذباتی تجربہ نہیں بلکہ ایک روحانی و فکری جستجو کا استعارہ ہے، اور جن کی شاعری میںآدمی اپنی گمشدہ انسانیت کو ڈھونڈتا ہوا نظر آتا ہے۔
اثر صدیقیؔ ملک کے مایہ ناز اور قابل ترین ناظمِ مشاعرہ بھی ہیں، معتبر شاعر بھی۔ ان کی شخصیت ادب، انکسار، اور فکری گہرائی کی حسین آمیزش ہے۔ ملک بھر کے مشاعروں میں ان کا کلام سن کر سامعین جس کیف میں ڈوب جاتے ہیں، وہ ان کی شاعری کے اثر کی دلیل ہے۔ بیرونِ ملک مشاعروں میں بھی جب وہ اپنے مخصوص لب و لہجے میں غزلیں پڑھتے ہیں تو محسوس ہوتا ہے کہ اردو زبان نے اپنی حلاوت اور وقار ان کے ذریعے ایک بار پھر تازہ کر لیا ہے۔
ان کا مجموعۂ کلام ’’انشراح‘‘ محض ایک شعری کتاب نہیں بلکہ ایک فکری سفر ہے احساس سے آگہی تک، دکھ سے دعا تک، اور ذات سے کائنات تک۔ اس مجموعے کے صفحات پر ایک ایسے شاعر کی روح بولتی ہے جو اپنے عہد کے تضادات سے ٹکرا کر بھی امید کا چراغ روشن رکھتا ہے۔ اثر صدیقیؔ کے اشعار پڑھتے ہوئے محسوس ہوتا ہے کہ لفظ ان کے ہاتھوں میں آئینہ بن جاتے ہیں، جن میں ہم اپنا زمانہ اور اپنی حقیقت دیکھ سکتے ہیں۔
غزل کی جاودانی خصوصیت یہ ہے کہ اس میں شاعر کا ذاتی و اجتماعی شعور ایک ساتھ سانس لیتا ہے۔ اثر صدیقیؔ کی غزلوں میں یہی خصوصیت نمایاں ہے۔ ان کے یہاں داخلی کیفیات اور خارجی مشاہدات ایک دوسرے سے اس طرح ہم آہنگ ہو جاتے ہیں کہ غزل کسی فرد کی نہیں بلکہ پوری انسانیت کی صدا بن جاتی ہے۔ وہ اپنے قاری سے مکالمہ کرتے ہیں، اسے محض سامع نہیں بلکہ شریکِ احساس بنا لیتے ہیں۔ یہی وہ فنی خصوصیت ہے جو اثر صدیقیؔ کو ان کے ہم عصر شعرا میں ممتاز کرتی ہے۔
غزل کے فن میں اثرؔ کا کمال یہ ہے کہ وہ اظہار کو اشارے کی صورت میں پیش کرتے ہیں۔ وہ اپنی بات کہہ بھی دیتے ہیں اور چھپا بھی لیتے ہیں۔ ان کی شاعری میں سادگی اور تہہ داری، درد اور نرمی، مزاحمت اور مسکراہٹ، سب ایک ساتھ جلوہ گر ہیں۔ ان کے فن میں وہ نرمی ہے جو پتھر کو موم بنا دے، اور وہ حرارت ہےقلب وجگر کو آگہی کی منزل سے روشناش کرا دے۔ یہی ان کی تخلیقی بصیرت ہے۔
ان کی شاعری میں کہیں طنز کا لطیف پہلو ہے، کہیں دکھ کی گہری تہہ۔ وہ نہ شکوہ کرتے ہیں نہ احتجاج؛ وہ تو اپنے قاری کو سوچنے پر مجبور کر دیتے ہیں۔ مثال کے طور پر ان کے یہ چار مصرعے دیکھئے:
قبائے جسم میں کردار بھی ضروری ہے
نیام کے لئے تلوار بھی ضروری ہے
سنہرے سانپ لپٹتے ہیںصرف صندل سے
فساد کے لئے تہوار بھی ضروری ہے
یہ محض طنز نہیں بلکہ انسان کی کمزوریاں اور سماج کے تضادات کا ایک آئینہ دار جھلک ہے۔سماج سے لیکر سیاست تک کے مزاج کو شاعر نے چار مصروںمیں سمیٹ لیا ہے اسی غزل میں شاعر کہتا ہے ۔؎
امیر شہرکو کرتا ہے روز وہ سجدے
خوشامدی ہے تو دربار بھی ضروری ہے
اس شعر میں شاعر نےخوشامدی مزاج کے لئے دربار لازم وملزوم ہے یہ بات کہہ کر دور حاضر کا وہ کرب بیان کیا ہے ،جس کی جھلک قصبہ قصبہ ، قریہ قریہ ہمیں نظر آتی ہے۔
اثر صدیقیؔ کی شاعری کی سب سے بڑی خوبی یہ ہے کہ وہ قاری کو شریکِ تخلیق بنا لیتے ہیں۔ جب قاری ان کے اشعار پڑھتا ہے تو اسے یوں لگتا ہے جیسے یہ اس کے دل کےآواز ہےجو کسی اور زبان سے ادا ہو گئ ہے۔ یہی کیفیت جدید تنقیدی اصطلاح میں Reader-based criticism کے تصور کو زندہ کرتی ہے۔ شاعر کے اشعار قاری کے ذہن میں نئی معنویت پیدا کرتے ہیں، اور یہی شاعری کی حقیقی کامیابی ہے۔
ان کے یہاں محض فصاحت نہیں بلکہ اثر کی گہرائی ہے۔ وہ غزل کو زندگی کی طرح برتتے ہیں، کہیں شکوہ، کہیں شکر، کہیں فقر، کہیں فخر۔ وہ جانتے ہیں کہ لفظ اگر دل سے نہ نکلے تو کان تک بھی نہیں پہنچتا۔ ان کے یہاں لفظ دل سے نکلتا ہے اور دل ہی میں اترتا ہے۔
اثر صدیقیؔ کے کلام میں اخلاقی شعور بھی نمایاں ہے۔ وہ ایک ایسے شاعر ہیں جو محبت کی بات بھی ذمہ داری کے ساتھ کرتے ہیں۔ ان کے یہاں عشق، انسان کو بہتر بنانے کا وسیلہ ہے نہ کہ اسے بے معنی خوابوں میں الجھانے کا سبب۔ ان کی شاعری میں عشق اور شعور، جمال اور اخلاق، ایک ساتھ جلوہ گر ہیں۔
ان کے چند اشعار دیکھیے جو اپنی تہہ داری میں وقت کی آواز بن گئے ہیں:
"سنگِ بنیاد کھودتے ہیں مکیں
ہورہا ہے گھروں میں کیا کیا کچھ"
یہ شعر بظاہر سماجی طنز ہے، مگر درحقیقت یہ انسان کے باطنی زوال کی نشاندہی کرتا ہے۔ شاعر کہہ رہا ہے کہ ہم اپنی بنیادیں خود کھود رہے ہیں ، خواہ وہ اخلاقی ہوں، فکری ہوں یا روحانی۔
اسی طرح:
"لفظ سے آ رہی ہے بُوئے غرور
پک رہا ہے سرور میں کیا کیا کچھ"
یہاں "بُوئے غرور" وہ خود پسندی ہے جو انسان کو اپنے الفاظ کا بھی اسیر بنا دیتی ہے۔ اثر صدیقیؔ کا طنز نرم ہے مگر دل میں اتر جاتا ہے۔
ان کے لہجے میں درد بھی ہے، انصاف کی طلب بھی۔
"درد، الزام، بے رخی، نفرت
دے دیا دوستوں نے، کیا کیا کچھ"
مندرجہ بالا اشعار محض شخصی تجربہ نہیں بلکہ اجتماعی المیہ ہیں۔ دوستوں کی بے رخی یہاں معاشرتی رشتوں کی کمزوری کا استعارہ بن جاتی ہے۔
اثر صدیقیؔ کی شاعری کا ایک اور امتیاز یہ ہے کہ وہ جذبات کو فلسفے میں اور فلسفے کو جذبے میں ڈھالنے کا ہنر جانتے ہیں۔ وہ شعر کہتے نہیں، محسوس کراتے ہیں۔ یہی ان کی تخلیقی قوت ہے۔
ان کے شعری مجموعے ’’انشراح‘‘ میں جو فکری تسلسل اور جمالیاتی توازن ملتا ہے، وہ جدید اردو شاعری میں کم یاب ہے۔ یہ مجموعہ دراصل اثرؔ کی روح کا آئینہ ہے۔ ان کی غزلیں محض مصرعوں کی خوبصورتی پر نہیں، بلکہ معنی کی گہرائی پر قائم ہیں۔ وہ غزل کو اس کی اصل روح میں برتتے ہیں، ایک ایسا آئینہ جس میں شاعر خود بھی دکھائی دیتا ہے اور زمانہ بھی۔
اثر صدیقیؔ کے یہاں زبان نہایت شستہ، محاوراتی، اور تازہ ہے۔ وہ اردو کی روایتی شائستگی کو قائم رکھتے ہوئے نئے مفاہیم کے دروازے کھولتے ہیں۔ ان کے یہاں کوئی لفظ بے مقصد نہیں آتا؛ ہر مصرعے میں ایک لطیف جمالیاتی شعور کارفرما ہے۔
اردو مشاعروں میں ان کی موجودگی کسی روشنی کی مانند ہے۔ وہ محفل کو محفل بناتے ہیں نہ شور سے، بلکہ سکون سے۔ ان کے اشعار سامع کے دل میں اترتے ہیں اور دیر تک اثر چھوڑ جاتے ہیں۔ یہی وجہ ہے کہ اثر صدیقیؔ کو نہ صرف ہندوستان بلکہ بیرونِ ملک اردو کے حلقوں میں بھی احترام کی نگاہ سے دیکھا جاتا ہے۔
ان کی شاعری کو اگر کسی ایک لفظ میں بیان کیا جائے تو وہ لفظ ہے ’’ انسانیت‘‘۔ ان کے اشعار میں انسان، اپنی ذات، اپنے خالق اور اپنی دنیا سے مکالمہ کرتا ہوا محسوس ہوتا ہے۔ وہ نفرت کے بجائے محبت کی زبان بولتے ہیں، اور یہی ان کی سب سے بڑی کامیابی ہے۔
اثر صدیقیؔ کا فن دراصل دل اور ذہن کے مکالمے کا نام ہے۔ وہ اپنے قاری کو یہ احساس دلاتے ہیں کہ شاعری صرف الفاظ کا کھیل نہیں بلکہ زندگی کی تفہیم کا ایک ذریعہ ہے۔ ان کے اشعار ہمیں سوچنے، محسوس کرنے، اور اپنے اندر جھانکنے پر مجبور کرتے ہیں۔ یہی اثر صدیقیؔ کی شاعری کی روح ہے اور شاید اسی لئے ان کے کلام کو پڑھنے کے بعد دل کہتا ہے:
"سانپ بستی کے دم بہ خود ہیں اثرؔ
زہر ہے سرپھروں میں، کیا کیا کچھ"
یہ شعر اثر صدیقیؔ کے تخلیقی شعور کا نچوڑ ہے۔ ایک ایسا شاعر جو اپنے زمانے کی زہر آلود فضا کو پہچانتا بھی ہے، اس پر بولتا بھی ہے، اور امید کا چراغ بھی جلائے رکھتا ہے۔
اثر صدیقیؔ کی شاعری کا کمال یہی ہے کہ وہ غم کو فن میں بدل دیتے ہیں۔ وہ دکھ سے جمال پیدا کرتے ہیں، اور المیے کو معنی میں ڈھال دیتے ہیں۔ ان کے اشعار دل سے نکل کر دل تک پہنچتے ہیں، اور قاری کو اپنے احساسات میں شریک کر لیتے ہیں۔ یہی ان کی اصل کامیابی ہے۔
’’انشراح ‘‘ کو پڑھنے کے بعد یہ احساس ہوا کہ اس شاعر سے جو اپنے درون ِ دل میں انسانیت کادرد رکھتا ہے اب تک بالمشافہ ملاقات کیوں نہیں کی اور فیضیاب کیوں نہیں ہوئے۔مولانا امتیاز فلاحی اور رونق افروز کے لئے دل سے دعائیں ،دعائیں اس مرحلے میں نکل رہی ہیںکہ انھوںنے معلم ِ انسانیتﷺ کے مشن کو زندہ اور پائندہ رکھنے والے اس شاعر سے بذریعہ ’’انشراح ‘‘ ملاقات کرادی ۔اللہ سے دعا ہے کہ اثرؔ صدیقی، وہ شاعر جو لفظوں سے انسان کی پہچان لکھتا ہے۔اس سے ملاقات بھی ہوجائے اور پھر؎
خوب گزرے گی جو مل بیٹھیں گے دیوانے دو
کے مصداق ہم بھی یہ کہہ سکیں گے کہ اثر صدیقی کی بزم میں ہم بھی شریک ہوئے تھے۔
