امڑاپور ، سر سید احمد خان اردو جونیئر کالج کے معلم محمد عابد شیخ کی نمایاں کامیابی ڈویژنل سطح پر پانچواں مقام، ریاستی مقابلے کے لیے ممبئی روانگی کی راہ ہموار

 

کھام گاؤں (واثق نوید) سر سید احمد خان اردو جونیئر کالج آف آرٹس اینڈ سائنس، امڑاپور کے محنتی و فعال معلم محمد عابد شیخ محبوب نے اسٹیٹ کونسل آف ایجوکیشنل ریسرچ اینڈ ٹریننگ (SCERT پونے) کے زیرِ اہتمام منعقدہ “کیریئر گائیڈنس اینڈ کونسلنگ” مقابلے میں شاندار کارکردگی کا مظاہرہ کرتے ہوئے ڈویژنل سطح پر پانچواں مقام حاصل کیا۔ 

اس کامیابی کے ساتھ ہی وہ جنوری 2026 میں ممبئی میں منعقد ہونے والے ریاستی سطح کے مقابلے کے لیے کوالیفائی کر گئے ہیں۔
 امراوتی ڈویژن کی نمائندگی کرنے والے اس مقابلے میں ایوت محل، واشم، اکولہ، بلڈانہ اور امراوتی اضلاع کے منتخب اساتذہ و تعلیمی عملے نے شرکت کی۔ مقابلے کا بنیادی مقصد اساتذہ کی پیشہ ورانہ و انتظامی صلاحیتوں کو نکھارنا اور طلبہ کی رہنمائی و کونسلنگ کے معیار کو مزید مؤثر بنانا تھا۔
 محمد عابد شیخ کی یہ کامیابی ادارے کے ساتھ ساتھ پورے ضلع کے لیے باعثِ فخر قرار دی جا رہی ہے۔
اس موقع پر کالج میں ایک مختصر مگر پُروقار تقریب منعقد ہوئی،
 جس میں الفلاح ایجوکیشن سوسائٹی کے صدر جناب شیخ اعظم اور پرنسپل شیخ ظفر نے محمد عابد شیخ کی گلپوشی کی اور ان کی محنت و لگن کو خراجِ تحسین پیش کیا۔
صدر سوسائٹی شیخ اعظم نے کہا کہ “ہمارے ادارے کے اساتذہ تعلیمی میدان میں ہمہ وقت سرگرم رہتے ہیں، محمد عابد شیخ کی کامیابی اسی تسلسل کا روشن ثبوت ہے۔”
پرنسپل شیخ ظفر نے امید ظاہر کی کہ “ریاستی سطح پر بھی وہ ادارے کا نام مزید روشن کریں گے۔”
ادھر کالج کے اساتذہ، غیر تدریسی عملے اور طلبہ نے محمد عابد شیخ کو دلی مبارکباد پیش کرتے ہوئے ان کے روشن تعلیمی مستقبل کے لیے نیک تمناؤں کا اظہار کیا ہے۔