پنجاب میں بورویل میں گرے بچے کو نو گھنٹے بعد محفوظ نکال لیا گیا

چنڈی گڑھ، 16 مئی (ہ س)۔ پنجاب کے ہوشیار پور کے گاوں چک سمانہ میں جمعہ کی شام تقریباً چار بجے بورویل میں گرے چار سالہ بچے کو این ڈی آر ایف، ایس ڈی آر ایف، پنجاب پولیس، انتظامی حکام اور مقامی باشندوں کے تعاون سے تقریباً نو گھنٹے بعد محفوظ باہر نکال لیا گیا۔

بورویل میں گرے بچے گرکرن سنگھ (فرزند ہریندر اور آشا، مزدور) کو رات تقریباً 12.40 بجے بورویل سے باہر نکالا گیا اور فوری طبی معائنے کے لیے اسپتال لے جایا گیا۔
ڈپٹی کمشنر عاشِقہ جین اور سینئر سپرنٹنڈنٹ آف پولیس سندیپ کمار ملک نے ریسکیو آپریشن کی شروع سے قیادت کی اور پورے آپریشن کو کامیاب بنانے کے لیے ٹیموں کی ثابت قدمی کی بھرپور ستائش کی۔ بچاو کا کام کامیابی سے مکمل ہونے کے بعد ڈپٹی کمشنر نے بتایا کہ بچے کو بچانے کے بعد ایمبولینس میں ڈاکٹروں کی ٹیم کے ساتھ مزید معائنے کے لیے اسپتال بھیج دیا گیا۔
انہوں نے بتایا کہ شام تقریباً 4 بجے یہ واقعہ پیش آیا اور اطلاع ملتے ہی انتظامی حکام فوری طور پر موقع پر پہنچ گئے تھے۔
انہوں نے بتایا کہ گرکرن اپنے گھر کے قریب کھلے بورویل میں گر گیا تھا، جو کل کھودا جا رہا تھا۔ بورویل کے بالکل ساتھ 30 فٹ سے زیادہ گہرا گڑھا کھودنے کے بعد بچاو ٹیموں نے بور کے ساتھ ایک تنگ راستہ بنا کر شافٹ تک رسائی حاصل کی اور کافی مشقت کے بعد بچے کو محفوظ باہر نکالا۔ بچہ بورویل میں گرنے کے بعد تقریباً 30 فٹ کی گہرائی میں پھنس گیا تھا۔ بچاو کا کام تیز کرنے کے لیے ضروری مشینری موقع پر لائی گئی۔ ضلع انتظامیہ نے شافٹ میں کیمرہ اور آکسیجن پائپ بھی نیچے اتارا، جس سے بچے کی حرکات و سکنات کو فوٹیج کے ذریعے دیکھا جا رہا تھا۔
ڈپٹی کمشنر نے کہا کہ این ڈی آر ایف کی ٹیم (40 سے زیادہ ارکان) نے اپنی مہارت سے اس مشکل وقت میں آپریشن کو محفوظ طریقے سے کامیاب بنایا۔
اس دوران پنجاب کے وزیرِ جیل خانہ جات ڈاکٹر روجوت سنگھ اور ہوشیار پور سے لوک سبھا رکنِ پارلیمنٹ ڈاکٹر راج کمار چبے وال، جو پورے ریسکیو آپریشن کے دوران موقع پر موجود رہے، 
انہوں نے گرکرن کو بچانے کے لیے تمام ٹیموں کی انتھک کوششوں کی تعریف کی۔ ڈاکٹر روجوت سنگھ نے کہا کہ ضلع انتظامیہ نے این ڈی آر ایف، دیگر ٹیموں اور مقامی گاوں والوں کی مدد سے بچے کو بورویل سے باہر نکالنے کے لیے پختہ انتظامات کیے، جن کی وجہ سے گرکرن کی جان بچ سکی۔
رکنِ پارلیمنٹ ڈاکٹر چبے وال نے کہا کہ یہ بہت نازک آپریشن تھا اور ٹیموں کی مسلسل کوششوں سے تقریباً سات گھنٹے کی جدوجہد کے بعد اسے کامیاب بنایا گیا۔
سینئر سپرنٹنڈنٹ آف پولیس سندیپ کمار ملک نے بھی بچے کو محفوظ باہر نکالنے کے لیے بچاو ٹیموں کا شکریہ ادا کیا۔ 
انہوں نے کہا کہ ٹیموں کا جذبہ بیحد قابلِ ستائش تھا، جس کی وجہ سے گرکرن کی جان بچ گئی۔
ہندوستھان سماچار
ہندوستان سماچار / انظر حسن