کھام گاؤں (واثق نوید) آل انڈیا آئیڈیل ٹیچرز ایسوسی ایشن (AIITA) مہاراشٹر کے زیرِ اہتمام امراؤتی میں اساتذہ کرام کے لیے "ایک قدم صالح تعلیمی انقلاب کی طرف" کے عنوان سے ایک خصوصی تعلیمی نشست منعقد کی گئی،
جس میں مختلف علاقوں سے بڑی تعداد میں اساتذہ نے شرکت کی۔ پروگرام کا مقصد AIITA کا تعارف کرانا، اساتذہ کے منصب و ذمہ داریوں کو اجاگر کرنا اور نئی نسل کی دینی، اخلاقی اور تعلیمی تربیت کے لیے اساتذہ میں احساسِ ذمہ داری کو مضبوط کرنا تھا۔
پروگرام کا آغاز حافظ نعمان صاحب کی تلاوتِ کلامِ پاک سے ہوا۔ افتتاحی خطاب میں امیرِ مقامی حافظ عبدالقادر صاحب نے قرآن کریم کے پہلے حکم "اقرأ" کی روشنی میں علم کی اہمیت اور استاد کے بلند مقام پر روشنی ڈالی۔
اس موقع پر AIITA مہاراشٹر کے نائب صدر جناب ریاض الخالق صاحب نے تنظیم کا تفصیلی تعارف پیش کرتے ہوئے اس کے مقاصد، سرگرمیوں اور مستقبل کے منصوبوں سے شرکاء کو آگاہ کیا،
جبکہ ریاستی مشاورتی کونسل کے رکن جناب ساجد خان صاحب نے تنظیم کے اغراض و مقاصد پر اظہارِ خیال کیا۔
رکنِ شوریٰ جماعت اسلامی ہند، مہاراشٹر جناب قاضی لئیق احمد صاحب نے "استاد: نسلِ نو کا محافظ" کے عنوان سے خطاب کرتے ہوئے کہا کہ موجودہ دور میں اساتذہ صرف علم منتقل کرنے والے نہیں بلکہ معاشرے کی صالح اور باکردار نسل تیار کرنے کے اہم ذمہ دار ہیں۔
انہوں نے اساتذہ پر زور دیا کہ وہ اپنی پیشہ ورانہ ذمہ داریوں کے ساتھ اخلاقی و تربیتی کردار کو بھی مؤثر انداز میں ادا کریں۔
پروگرام کے اختتامی مرحلے میں اوپن ڈسکشن سیشن منعقد ہوا، جس میں شرکاء نے AIITA کی سرگرمیوں اور تنظیمی امور سے متعلق مختلف سوالات کیے، جن کے ذمہ داران نے تفصیلی اور اطمینان بخش جوابات دیے۔
نشست کا اختتام AIITA مہاراشٹر کے ریاستی صدر جناب محمد عتیق شیخ صاحب کے صدارتی خطاب اور امیرِ مقامی حافظ عبدالقادر صاحب کی دعا پر ہوا، جبکہ نظامت کے فرائض جناب عظمت اللہ خان صاحب نے انجام دیے۔
پروگرام کی کامیابی میں مقامی جماعت اسلامی ہند کے کارکنان نے بھرپور تعاون کیا۔ نشست کے اختتام پر تمام شرکاء کے لیے طعام کا بھی اہتمام کیا گیا۔
