ناندیڑ ، عبدالملک نظامی کو ’’بے نظیر لائف ٹائم اچیومنٹ ایوارڈ 2025‘‘ کا اعزاز اردو تعلیم، ادبی خدمات اور تربیتِ اساتذہ کے میدان میں نمایاں کردار کا اعتراف

کھام گاؤں ( واثق نوید) منشی توصیفی کمیٹی سولاپور نے مہاراشٹر کی ممتاز ماہرِ تعلیم، ادیب اور صحافی جناب عبدالملک عبدالقادر نظامی کو سال 2025 کے لیے باوقار "بے نظیر لائف ٹائم اچیومنٹ ایوارڈ" کے لیے منتخب کیا ہے۔
یہ ایوارڈ اُن کی گراں قدر تعلیمی، ادبی، صحافتی اور سماجی خدمات کے اعتراف میں 9 نومبر 2025 کو اردو گھر، سولاپور میں ایک پروقار تقریب کے دوران پیش کیا جائے گا۔ عبدالملک نظامی صاحب آن لائن رسالہ "تعلیم و تربیت" (ناندیڑ) کے مدیرِ اعلیٰ اور دہلی سے شائع ہونے والے معروف ادبی رسالے "منادی" کے مدیر ہیں۔
وہ ریاستی سطح پر اردو زبان کے فروغ، نصابی رہنمائی، اور اساتذہ کی تربیت میں نمایاں خدمات انجام دے رہے ہیں۔
مزید برآں، وہ لسانی کمیٹی بال بھارتی پونے اور نصابی کمیٹی ایس سی ای آر ٹی پونے کے رکن کی حیثیت سے بھی اردو کے فروغ میں سرگرم ہیں۔
> "اردو زبان و ادب کے لیے جناب نظامی صاحب کی خدمات نئی نسل کے لیے مشعلِ راہ ہیں" — منشی توصیفی کمیٹی سولاپور
ایوارڈ کے اعلان کے بعد ریاست بھر کے اساتذہ، صحافیوں اور اہلِ ادب کی جانب سے جناب نظامی صاحب کو مبارکبادی پیغامات موصول ہو رہے ہیں، اور سوشل میڈیا پر بھی ان کی خدمات کو خراجِ تحسین پیش کیا جا رہا ہے۔